ពានរង្វាន់បាល់ទាត់ អេ អឹម ខេ ២០១៦
ភ្នំពេញៈ កម្មវិធីប្រកួតបាល់ទាត់ដើម្បីដណ្តើមពានរង្វាន់ អេ អឹម ខេ ឆ្នាំ២០១៦ បានចាប់ផ្តើមកាលពីថ្ងៃទី៣០ ខែកក្កដា ឆ្នាំ២០១៦ ដោយមានក្រុមកីឡាករសរុបចំនួន ៣១ក្រុម មកពីគ្រប់សាខា អេ អឹម ខេ ទូទាំងប្រទេស។ កម្មវិធីនេះត្រូវបានរៀបចំឡើងក្នុងគោលបំណងដើម្បីបង្កើនចំណងមិត្តភាព សុខភាព និងសហប្រតិបត្តិការកាន់តែជិតស្និតរវាងបុគ្គលិក អេ អឹម ខេ ទាំងអស់។
គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី ក្រៅពីជួយដល់ប្រជាពលរដ្ឋក្រីក្រតាមរយៈការផ្តល់សេវាមីក្រូហិរញ្ញវត្ថុ សមស្រប អេ អឹម ខេ តែងតែបង្កើតបរិយាកាសសប្បាយរីករាយដល់បុគ្គលិករបស់ខ្លួនជាច្រើនដូជា៖ ការកសាងក្រុមការងារ ការចូលរួមក្នុងសកម្មភាពការងារសង្គមនានា និងជាពិសេសការលើកទឹកចិត្តបុគ្គលិកទាំងអស់ឲ្យចូលរួមលេងកីឡាគ្រប់ៗគ្នាដើម្បីលើកកម្ពស់សុខមាលភាព ។
លោក សួន ពិសី នាយកប្រតិបត្តិឥណទាន និងជាប្រធានគណៈកម្មការបាល់ទាត់បានមានប្រសាសន៍ថា “កីឡានាំមកនូវសុខភាព និងមិត្តភាព។ អេ អឹ ខេ យល់ឃើញថា ការបង្កើតអោយមានកម្មវិធីប្រកួតបាល់ទាត់នេះឡើងក្នុងគោលបំណងបង្កើតឲ្យមានភាពរីករាយស្និទស្នាលក្នុងរង្វង់គ្រួសារ អេ អឹម ខេ ហើយថែមទាំងជួយអោយបុគ្គលិកទទួលបានសុខភាពល្អទៀតផង”។ បើយោងតាមលោកប្រធានគណៈកម្មការកម្មវិធីពានរង្វាន់ឆ្នាំនេះគឺមានលក្ខណៈពិសេសជាងរាល់ឆ្នាំ ព្រោះឆ្នាំនេះប្រាក់រង្វាន់លើកទឹកចិត្ត នឹងកើនដល់ចំនួន ២លានរៀលចំពោះក្រុមដែលទទួលជ័យលាភីលេខ១។
អេ អឹម ខេ បានបង្កើតឲ្យមានកម្មវិធីប្រកួតពានរង្វាន់បាល់ទាត់នៅក្នុងឆ្នាំ២០០៨។ មកដល់ពេលនេះគឺមានរយៈពេល ៩ឆ្នាំហើយ។ នៅក្នុងឆ្នាំ២០១៥ បន្ទាប់ពីធ្វើការប្រកួតយ៉ាងស្វិតស្វាញអស់រយៈពេលប្រមាណ៥ខែមក យើងបាន រកឃើញអ្នកគ្រងដំណែងជើងឯកគឺបានទៅលើក្រុមកីឡាករបាល់ទាត់មកពីសាខាកំពង់ធំ។
គួរបញ្ជាក់ផងដែរថា ចំពោះសមាសភាពក្រុម ដែលអាចចូលរួមក្នុងការប្រកួត គឺអនុញ្ញាតអោយតែបុគ្គលិករបស់គ្រឹះស្ថានមីក្រូហិរញ្ញវត្ថុ អេ អឹម ខេ តែប៉ុណ្ណោះ។ សាធារណជនដែលមកពីខាងក្រៅមិនមែនជាបុគ្គលិករបស់គ្រឹះស្ថាន មិនត្រូវបានអនុញ្ញាតឲ្យចូលលេងក្នុងការប្រកួតទេ។