ភ្នំពេញថ្ងៃទី៥ ខែមករា ឆ្នាំ២០២៦ គ្រឹះស្ថានមីក្រូហិរញ្ញវត្ថុ អេ អឹម ខេ ដែលជាគ្រឹះស្ថានមីក្រូហិរញ្ញវត្ថុឈានមុខគេនៅកម្ពុជា មានមោទកភាពយ៉ាងក្រៃលែងក្នុងការប្រកាសថា អេ អឹម ខេ ទទួលបានពានរង្វាន់ដ៏មានកិត្យានុភាព “HR Asia Best Companies to Work for in Asia 2025” ពីស្ថាប័ន HR Asia ដែលជាស្ថាប័នដ៏ល្បីល្បាញបំផុតក្នុងតំបន់អាស៊ី។

ការទទួលបានពានរង្វាន់កម្រិតអន្តរជាតិនេះ គឺជាសក្ខីភាពបញ្ជាក់យ៉ាងច្បាស់ពីការប្តេជ្ញាចិត្តរបស់ អេ អឹម ខេ ជានិយោជកឆ្នើមក្នុងតំបន់អាស៊ីដែលបានអនុវត្តកិច្ចការងារធនធានមនុស្សដ៏ល្អពោរពេញដោយធនធានមានទេពកោសល្យ មានការលើកកម្ពស់ការចូលរួមពីបុគ្គលិកគ្រប់ជាន់ថ្នាក់ ក្នុងការកសាង និងរក្សានូវវប្បធម៌ការងារដ៏ល្អប្រសើរដែលផ្តល់អាទិភាពខ្ពស់ទៅលើសុខុមាលភាព ការអភិវឌ្ឍសមត្ថភាព និងការផ្តល់តម្លៃដល់បុគ្គលិកគ្រប់រូប។

លោក គា បូរាណ ប្រធាននាយកប្រតិបត្តិនៃគ្រឹះស្ថានមីក្រូហិរញ្ញវត្ថុ អេ អឹម ខេ បានមានប្រសាសន៍ថា «យើងខ្ញុំពិតជាមានកិត្តិយសយ៉ាងក្រៃលែង ដែលត្រូវបានទទួលស្គាល់ដោយស្ថាប័ន HR Asia ថាជាកន្លែងធ្វើការដ៏ល្អបំផុតមួយនៅក្នុងតំបន់អាស៊ី។ ពានរង្វាន់នេះ មិនមែនគ្រាន់តែជាសមិទ្ធផលរបស់គ្រឹះស្ថានប៉ុណ្ណោះទេ ប៉ុន្តែគឺជាផ្លែផ្កានៃការខិតខំប្រឹងប្រែង និងការលះបង់កម្លាំងកាយចិត្តរបស់បុគ្គលិក អេ អឹម ខេ ទាំងអស់ ក្នុងការបំពេញភារកិច្ចជារៀងរាល់ថ្ងៃ។»

លោកបានបន្ថែមទៀតថា៖ «នៅ អេ អឹម ខេ យើងតែងតែជឿជាក់ថា បុគ្គលិកគឺជាទ្រព្យសម្បត្តិដ៏មានតម្លៃបំផុត។ ហេតុដូច្នេះ យើងតែងតែផ្តោតសំខាន់លើការបង្កើតបរិយាកាសការងារប្រកបដោយបរិយាបន្ន ភាពចម្រុះ និងឱកាសស្មើគ្នា ដើម្បីធានាថាបុគ្គលិករបស់យើងមានឱកាសរីកចម្រើនក្នុងអាជីពការងារ ព្រមទាំងមានតុល្យភាពរវាងការងារ និងជីវិតឯកជន។»